TASANIA YA MUZIKI MBEYA IMEJAA WASANII PANDIKIZI — CHANGAMOTO NA MADHARA KWA MAENDELEO YA SANAA – SEHEMU YA KWANZA

Tasnia ya muziki mkoani Mbeya kwa kipindi cha hivi karibuni imekuwa ikikumbwa na changamoto kubwa ya kudumaa kwa ukuaji wake, jambo ambalo limeibua maswali mengi miongoni mwa wadau wa sanaa na mashabiki wa muziki wa mkoa huo. Mdau wa sanaa kutoka nyanda za juu kusini, ndugu Robert Eliah, amefichua ukweli ulio wazi lakini mara nyingi hupuuzwa kwamba tasnia ya muziki Mbeya imejaa wasanii pandikizi — wasanii ambao wamepandikizwa na watu wenye ushawishi kwa maslahi binafsi bila kuzingatia vipaji na ubora wa kazi zao.

Kwa mujibu wa Robert, hali hii imesababisha muziki wa Mbeya kupoteza hadhi yake na kushindwa kuendelea mbele ukilinganisha na kipindi cha nyuma, hususani miaka ya 2017 na nyuma. Wasanii wenye vipaji halisi wamekuwa wakisahaulika, huku nafasi zao zikichukuliwa na wasanii wasio na uwezo wa kweli wa kimuziki bali wanaotegemea ukaribu na watu wenye nafasi kwenye mnyororo wa tasnia ya muziki.

SABABU ZINAZOSABABISHA WASANII PANDIKIZI KUTAWALA

Kwa kiasi kikubwa, hali hii imetokana na:

1. Mapendeleo na Urafiki kwenye Tasnia: Watu wenye nafasi katika media, uandaaji wa matamasha, na usimamizi wa muziki wanachagua kuwapromoti wasanii ambao wanaweza kuwatii na kuwatumikia, bila kujali ubora wa kazi zao.
2. Ukosefu wa Misingi Imara ya Kukuza Vipaji: Hakuna mifumo ya wazi inayotoa nafasi sawa kwa kila msanii kujitambulisha kwa misingi ya kipaji, bali kila kitu kinategemea “kujuana.”
3. Maslahi Binafsi: Wadau wanawapa nafasi wasanii wanaoweza kutumika kirahisi kwa malengo ya kifedha au ya kikundi, huku vipaji halisi vikibaki bila msaada.

Mfano wa Wasanii Halisi Walioachwa Pembeni

Mbeya imeshuhudia vipaji vingi vya kweli vikikosa nafasi kwenye vyombo vya habari, matamasha na hata majukwaa ya kitaifa. Wasanii kama:

-          Msanii ‘C’ — anayejulikana kwa sauti yake ya kipekee na uwezo mkubwa wa kuandika mashairi yenye maudhui halisi yanayoelezea maisha ya jamii, mahusiano, vijana wa mtaa n.k, amekuwa akikosa nafasi licha ya kazi zake kuonyesha ubora wa hali ya juu.

-          Msanii ‘K’ — msanii anayechanganya miondoko ya Hip Hop na Singeli kwa ustadi wa hali ya juu, lakini amekuwa akisukumwa pembeni na kushindwa kupata nafasi kwenye media kubwa za mkoa.

-          Msanii ‘H’ — miongoni mwa wasanii wenye uwezo mkubwa wa live performance, lakini mara nyingi amekuwa akipitwa na nafasi kwa sababu ya kutokuwa karibu na wadau wakubwa wa muziki wa Mbeya.

Wasanii hawa ni mfano tu wa vipaji vingi vilivyopo Mbeya ambavyo vimeachwa nyuma kwa sababu ya mfumo usiozingatia ubora bali “kule wanakotaka wenye nguvu” kwenye tasnia.

ATHARI KWA TASNIA YA MUZIKI MBEYA

Matokeo ya hali hii yamekuwa mabaya sana kwa maendeleo ya sanaa mkoani Mbeya:

-          Ubunifu na Ubora wa Muziki Umeporomoka: Muziki wa wasanii wengi waliopata nafasi hautofautiani sana, hauna utambulisho wa kipekee na mara nyingi hauwezi kuvuka mipaka ya mkoa.

-          Motisha Kupungua kwa Wasanii Halisi: Wasanii wenye vipaji na juhudi wanakata tamaa kwa kuona nafasi zinapewa watu wasiostahili.

-          Tasnia Kudumaa: Bila vipaji halisi kusimama na kusikika, Mbeya imeshindwa kutoa wasanii wa taifa au kimataifa kama ilivyokuwa ikitarajiwa.

NJIA YA KUTATUA TATIZO HILI

Kwa tasnia ya muziki Mbeya kufufuka,Robert anasema kunahitajika mabadiliko ya kweli katika mfumo mzima:

-          Media na Vyombo vya Habari: Vihakikishe vinatangaza kazi kwa misingi ya ubora, si mahusiano binafsi.

-          Majukwaa ya Vipaji: Kuanzishwa kwa majukwaa ya wazi na huru ya kuibua na kuendeleza vipaji vya kweli, bila upendeleo na yanayoeleweka kama vile KINASA WAZI, AFRIKA HURU CYPHER, MAX D na mengine.

-          Ushirikiano wa Wasanii Halisi: Wasanii wenye vipaji wajikusanye kwa pamoja kuunda majukwaa yao ya kujitangaza na kushirikiana bila kutegemea wadau wabinafsi (Ingawa njia hii kwa Mbeya ni ngumu kuwezekana lakini kujaribu sio mbaya)

HITIMISHO (SEHEMU YA KWANZA)

Robert anamalizia kwa kusema - ‘Tasnia ya muziki wa Mbeya bado ina nafasi ya kufufuka endapo kila mdau atachukua hatua ya kupigania haki na nafasi kwa wasanii wenye vipaji halisi. Wasanii pandikizi wamekuwa kikwazo kikubwa kwa maendeleo ya sanaa, lakini mabadiliko yanawezekana kupitia mshikamano, uwazi na kujitolea kwa wale wanaothamini sanaa ya kweli’.