MDACHI WA WADACHI: SAFARI YA NDOTO, VIPAJI, NA UJASIRI WA KUUNDA HISTORIA

Katika dunia ya muziki inayobadilika kwa kasi na yenye ushindani mkubwa, kuna sauti chache zinazojitokeza si kwa sababu tu ya kipaji, bali kwa sababu ya dhamira ya kweli ya kubadilisha maisha ya wengine. Moja ya sauti hizo ni ya Mdachi wa Wadachi, jina linalobeba hadhi, uhalisia na mapinduzi katika muziki wa Tanzania. Akiwa ni mtayarishaji wa muziki, muigizaji na msimamizi wa vipaji, Mdachi ameweka alama yake katika tasnia kwa njia ya kipekee, akiwa pia mwanzilishi na Mkurugenzi Mtendaji wa Wadachi Music.

MWANZO USIOELEWEKA, LAKINI ULIOJAA MAONO

Kama wengi waliozaliwa na kipaji, Mdachi alianza kama muimbaji. Muziki ulikuwa sehemu ya maisha yake, lakini hakuwahi kufikiria kuwa siku moja atakuwa mtayarishaji. Alipoanza kuzunguka studio mbalimbali, aliona changamoto inayowakumba wasanii wengi wenye vipaji – kukosa uwezo wa kifedha kurekodi kazi zao. Kwa kuwa alihisi maumivu yao, aliapa kuwa sehemu ya suluhisho. Ndipo akazaliwa Wadachi Music Studio, mwaka 2016.

Akiwa hajui chochote kuhusu studio wala vifaa vya utayarishaji, alianza safari ya kujifunza kwa macho – kwa kuwaangalia producers waliomtangulia kama Smart Junior, Man Walter, na Pancho Latino. Kila kosa lilikuwa darasa, na kila mafanikio ya msanii alikuwa akihusika nayo kwa dhati, kama kaka mkubwa.

KUELEKEA MAFANIKIO – HATUA KWA HATUA

Kazi yake ya kwanza iliyoonesha mwelekeo wa mafanikio ilikuwa "A Story" ya msanii J Regius mwaka 2018. Ilisikika kwa nguvu kwenye media za Mbeya na kufungua mlango kwa kazi nyingine kama "Usinivuruge" ya Dallax na "Pombe" ya Smile Kiss – wimbo uliomfanya Mdachi atambulike kitaifa, ukachezwa kwenye media za mikoa mbalimbali na hata nje ya Nyanda za Juu Kusini.

Amefanya kazi na wasanii wakubwa kama Bando, Mesen Selekta, Steve RnB, huku studio yake ikigeuka kuwa kisima cha vipaji na jukwaa la mafanikio kwa majina kama Miss Rain, Fax Music, Brandy, Geezy, 1Shoboy Alveen, Remedy Africa, na wengineo.

WADACHI MUSIC – FAMILIA YA MUZIKI, SIO STUDIO TU

Kwa Mdachi, Wadachi Music si studio ya kurekodi tu – ni familia. Wasanii waliowahi kupita hapo wanaendelea kubeba nembo ya Wadachi hata wanapokuwa nje ya studio. Leo, Wadachi Music Family ni jamii yenye wasanii wengi wanaoshirikiana kwenye kazi, huku Smile Kiss akiwa msanii wa pekee rasmi kwasasa chini ya Wadachi Music Label. Wengine wapo njiani kutambulishwa rasmi.

ZAIDI YA MUZIKI: UIGIZAJI, USIMAMIZI, NA MIPANGO MIKUBWA

Mbali na muziki, Mdachi pia ni muigizaji mwenye kipaji na msimamizi wa kazi za wasanii. Ingawa haimbi mara kwa mara, ana uwezo huo, na pia amejaribu uongozaji wa video pale inapobidi. Changamoto za kufanya majukumu mengi kwa wakati mmoja ni nyingi, lakini kwa kupanga ratiba vizuri na kusaidiwa na vijana wake wanaojifunza utayarishaji, anaendelea kutoa matokeo bora bila kuyumbishwa na presha ya kazi.

KUTOKA CHANGAMOTO MPAKA MAFANIKIO

Changamoto zimekuwepo – wasanii kuvunja makubaliano, kutokuwa na uelewano, na wakati mwingine kukataliwa na wale aliowasaidia. Hata hivyo, Mdachi hakurudi nyuma. Alijifunza umuhimu wa mikataba ya maandishi, nidhamu ya kazi, na kuweka msingi imara wa mawasiliano. Hii ndiyo sababu studio yake imekuwa shule isiyo rasmi kwa producers wapya, ambao leo hii wanafanya vizuri kwenye tasnia.

KAULI MBIU NA DIRA YA MAISHA

Mdachi anasema:

"Juhudi haziongopi – usikate tamaa kwenye kile unachokipambania, maana kesho yako njema ipo. Muhimu ni kuongeza juhudi, ipo siku milango itafunguka kwa ukubwa wa ajabu."

Dira yake ni kuona Wadachi Music inakuwa label kubwa kama ya Don Jazzy, Olamide, au hata Jay Z – na katika upande wa uigizaji, kuandaa kazi zenye ubunifu, tofauti, na zenye hadhi ya kimataifa.

Mdachi wa Wadachi ni mfano wa kwamba mafanikio hayahitaji kuanza na kila kitu – yanahitaji moyo wa kujifunza, nia ya kusaidia wengine, na uthubutu wa kusimama katikati ya changamoto na kuendelea kupiga hatua. Kwa sauti yake ya kipekee na kazi zake zenye kugusa mioyo, jina lake limejikita kwenye ramani ya muziki wa Tanzania – na safari yake bado inaendelea.