VOCALIZER NA SDP UPDATES: MAPINDUZI YA HABARI KIDIGITALI NYANDA ZA JUU KUSINI

Katika siku yake ya kuzaliwa tarehe 3 Machi 2025, Mwanahabari na Mmiliki wa SDP UPDATES, Salum Juma Langa maarufu kama Vocalizer, alifanya mahojiano maalum na Burudani Mbeya Media, akielezea safari yake katika tasnia ya habari, changamoto, mafanikio na ndoto zake za baadaye.

 SAFARI YA KAZI YA UWANAHABARI

Salum Juma Langa alihitimu masomo yake ya uanahabari mwaka 2017 na mwaka huo huo alianza rasmi safari yake ya kazi katika kituo cha redio Bomba FM. Hata hivyo, kabla ya

hapo, alifanya kazi katika Sweet FM kama mtangazaji wa vipindi vya burudani.

Licha ya kuwa na ndoto ya kuwa mwanamuziki, mapenzi yake kwa tasnia ya habari yalimsukuma kuwa mtangazaji, akichukua fursa ya kipawa chake cha sauti na uwezo wa kuzungumza kwa ufasaha. Katika safari yake, alihamasishwa na watangazaji wakubwa kama Salim Kikeke wa BBC, na kwa sasa anapata motisha kutoka kwa majina makubwa kwenye vyombo vya habari vya kidigitali kama Sky na Millard Ayo.

VYOMBO VYA HABARI ALIVYOFANYIA KAZI

Katika safari yake ya kazi, Vocalizer amepitia vyombo mbalimbali vya habari, akianza kama mtangazaji wa vipindi vya burudani katika Sweet FM, kisha kuhamia Bomba FM ambako alifanya kazi si tu kama mtangazaji wa burudani, bali pia wa vipindi vya habari na michezo, na hatimaye kuwa Mkuu wa Vipindi katika kituo hicho. Aidha, alipata

nafasi ya kushirikiana na BBC Swahili kama mwandishi wa habari kutoka Mbeya.

SAFARI YA KUANZISHA SDP UPDATES

Baada ya miaka ya kujifunza na kupata uzoefu katika vyombo vikubwa vya habari, Vocalizer aliamua kuanzisha SDP UPDATES, chombo cha habari cha kidigitali kinacholenga kusambaza habari, burudani, na vipindi mbalimbali kwa njia ya mtandaoni. Alisema kuwa

mabadiliko ya kidigitali na upungufu wa majukwaa ya kidigitali yanayoshughulikia sanaa katika Nyanda za Juu Kusini vilimsukuma kuanzisha SDP UPDATES.

Licha ya kuwa kiongozi katika Bomba FM, uamuzi wa kuacha nafasi hiyo haukuwa rahisi. Hata hivyo, aliona ni wakati wake wa kujitegemea na kujenga jina lake kupitia chombo chake cha habari. Hadi sasa, anajivunia mafanikio makubwa kupitia SDP UPDATES, huku akiamini kuwa juhudi zake, pamoja na msaada wa timu yake, zitalifanya kuwa chombo namba moja cha habari katika Nyanda za Juu Kusini.

 

MAFANIKIO NA CHANGAMOTO

Kupitia kazi yake ya uwanahabari, Vocalizer amepata mafanikio mengi, ikiwa ni pamoja na

kufahamika zaidi, kujenga mtandao wa watu, na kupata kipato kupitia chombo chake cha habari. Ameweza pia kusaidia vijana zaidi ya kumi kujifunza kazi ya uwanahabari na kuwapa mwanga wa kuendelea katika tasnia hiyo.

Changamoto kubwa aliyokumbana nayo ni wakati wa kujitambulisha kwenye tasnia, ambapo ilimchukua muda kupata uaminifu wa watu. Hata hivyo, kwa juhudi na uvumilivu, alifanikiwa kujijenga na kuleta mabadiliko chanya katika kazi yake.

HABARI NA MAHOJIANO YANAYOMPA FAHARI

Kati ya mahojiano mengi aliyowahi kufanya kupitia SDP UPDATES, Vocalizer anajivunia sana mahojiano yake na

Young Lunya, ambapo aliweza kusaidia kumtambulisha kijana mdogo kutoka Mbeya aitwaye Danny Lunya kwa hadhira ya Tanzania nzima. Anasema kuwa mahojiano haya yalileta mafanikio makubwa na ni moja kati ya kazi zake alizojivunia zaidi.

USHAURI KWA VIJANA

Kwa vijana wanaotaka kujiingiza katika tasnia ya habari na burudani, Vocalizer anawashauri wawekeze nguvu kwenye sekta ya kidigitali, kwani dunia inakwenda kasi sana na kuna fursa nyingi za kujipatia kipato kupitia majukwaa ya mtandaoni. Pia anawahimiza kuwa wavumilivu, kwani mafanikio hayaji kwa usiku mmoja bali yanahitaji

muda, mchakato na uvumilivu.

HITIMISHO

Safari ya Salum Juma Langa a.k.a Vocalizer ni mfano halisi wa jinsi nidhamu, bidii, na kutumia fursa za kidigitali vinavyoweza kubadili maisha ya mtu na kumfikisha mbali. Kupitia SDP UPDATES, anaendelea kuleta mapinduzi katika tasnia ya habari, huku akiwahamasisha vijana wengi zaidi kujiingiza katika uwanja wa habari na burudani kwa kutumia teknolojia ya kisasa.

Burudani Mbeya Media inamtakia kila la heri katika safari yake ya uwanahabari na maendeleo ya SDP UPDATES.