DJ SPEED ATUNUKIWA TUZO YA HESHIMA – BURUDANI MBEYA AWARDS 2025

Katika mwendelezo wa kutambua mchango wa watu walioweka msingi na kuendeleza sanaa katika ukanda wa Nyanda za Juu Kusini, Omary Juma, maarufu kama DJ Speed, ametunukiwa rasmi Tuzo ya Heshima kwenye Burudani Mbeya Awards 2025 kwa mchango wake mkubwa kwenye tasnia ya muziki na katika fani ya U-DJ wa kisasa.

MWAKILISHI WA “GENERATION YA MAPINDUZI”

DJ Speed anawakilisha generation ya tatu ya muziki, yaani kipindi cha miaka 2006 hadi 2015, kilichokuja baada ya generation ya kwanza (1990–2000) na ya pili (2001–2005). Hii ni generation iliyoleta mapinduzi ya kweli katika fani ya U-DJ na muziki kwa ujumla, hasa kwa kuingiza teknolojia na mbinu mpya za kupromote muziki ndani na nje ya Mbeya.

Kupitia kipindi hicho, DJ Speed aliibuka kama mmoja wa madj wa mwanzo kuhamisha fani ya U-DJ kutoka kwenye mitaa na harusi hadi kwenye redio, kumbi kubwa za burudani, matamasha, na majukwaa ya kitaalamu.

MCHANGO WAKE KWENYE TASNIA

Mwasisi wa Mbeya All Star: Mnamo mwanzoni mwa miaka ya 2010, DJ Speed aliliasisi kundi hili muhimu lililowaleta pamoja wasanii wa Mbeya kwa lengo la kushirikiana, kusaidiana na kuinua kazi zao na kuisemea jamii kupitia muziki. Wimbo maarufu uliovuma sana kupitia Mbeya all Stars uliitwa MBEYA NYUMBANI.

MWANZILISHI WA TEAMKAZI ENTERTAINMENT

Kupitia uongozi wake, DJ Speed alisimamia na kukuza wasanii kadhaa wa Bongofleva, na pia aliwajengea nafasi madj chipukizi.

PROMOTER NA MENEJA WA WASANII

Alikuwa Dj wa mwanzoni kuanzisha utaratibu wa kuwapromote wasanii kupitia majukwaa ya kitaalamu na mitandao ya kijamii, akiwapa shows, airtime kwenye redio, na usimamizi wa kisanaa.

MLEZI WA VIPAJI

Mojawapo ya sifa kubwa ya DJ Speed ni uwezo wake wa kugundua na kulea vipaji, hasa kutoka kizazi cha tatu cha wasanii wa Nyanda za Juu Kusini. Wengi wao wanamchukulia kama mlezi, daraja na nguzo ya mafanikio yao ya kwanza kwenye muziki.

TUZO YA HESHIMA: USTAHILI ULIO DHAHIRI

Kwa kutumia ushawishi wake na uzoefu wa miaka mingi, DJ Speed ameacha alama isiyofutika katika ramani ya burudani. Tuzo ya heshima anayopokea mwaka huu ni uthibitisho wa jinsi alivyokuwa msingi imara wa ukuaji wa fani ya muziki katika mkoa wa Mbeya na maeneo jirani.

DJ Speed ni mfano wa wale watu wa nyuma ya pazia walioamua kutoa muda, nguvu na rasilimali zao kwa ajili ya kuinua wengine. Kwa kutambuliwa kwake, Burudani Mbeya Awards inaendeleza dhamira yake ya kuenzi historia, mchango na uzalendo wa kweli kwenye sanaa ya muziki.

 

BURUDANI MBEYA AWARDS 2025 – KUKUTAMBUA NI HESHIMA YETU.