BETIKA MBEYA TULIA MARATHON 2025: MBEYA YAANDIKA HISTORIA MPYA YA UMOJA, UTAMADUNI NA UCHUMI

Mei 9-10, 2025, mji wa Mbeya uliwaka moto wa hamasa, vipaji, mshikamano na fursa, kupitia tukio lililogeuka kuwa gumzo la kitaifa – Betika Mbeya Tulia Marathon 2025. Tukio hili limevunja rekodi, kuvusha mipaka na kuonesha taswira mpya ya Mbeya, kama kitovu cha maendeleo jumuishi nchini Tanzania.

Tukio hili kubwa limeandaliwa na TULIA TRUST, taasisi inayoongozwa na MHE. DKT. TULIA ACKSON, Mbunge wa Mbeya Mjini na Spika wa Bunge la Jamhuri ya Muungano wa Tanzania. Kwa mara nyingine, Dkt. Tulia ameonesha namna uongozi wake unavyogusa maisha ya watu kwa matendo, sio tu kwa sera. Kupitia marathon hii, Mbeya haikupiga hatua moja tu – bali ilikimbia mbele kwa kasi ya maendeleo ya kweli.

WASANII WA MBEYA WATINGISHA

Japo tukio lilihudhuriwa na wasanii maarufu kutoka sehemu mbalimbali za Tanzania, msisimko mkubwa uliletwa na wasanii wa nyumbani – Mtafya, Zax 4Real, JFish Hunter, Mc Mboneke, Mr. Mkazi na wengine. Kwa nyanja tofauti – muziki, uigizaji, vichekesho na dansi – walionesha kuwa Mbeya ni hazina ya vipaji. Hii ilikuwa fursa adimu ambapo wasanii wa mkoa walipata heshima na hadhi ya kitaifa, wakisimama bega kwa bega na mastaa wa Tanzania nzima.

UCHUMI WAZIDI KUCHANJA MBUGA: MBEYA YAWA KITUO CHA FURSA

Betika Mbeya Tulia Marathon 2025 imekuwa zaidi ya mashindano ya riadha – imekuwa chachu ya mzunguko wa uchumi. Huduma za malazi, chakula, usafiri, burudani, vinywaji, utalii, huduma za kifedha na biashara ndogo ndogo zilipata msukumo mkubwa. Wenye nyumba za kulaza wageni walijaza hadi vyumba vya akiba, mama lishe wakafurahia foleni za wateja, madereva bodaboda na teksi wakaongeza mizunguko – ni mafanikio ambayo hayatasahaulika.

UMOJA BILA MIPAKA: MBEYA YAWAKUTANISHA WATU WA MAKUNDI TOFAUTI

Katika hali ya kusisimua na ya kipekee, tukio hili liliwakutanisha watu kutoka nyanja mbalimbali: wanasiasa wa vyama tofauti, viongozi wa dini, wasanii, wanamichezo, wafanyabiashara, wanafunzi na familia kutoka mikoa na nchi jirani. Mbeya iligeuka kuwa daraja la amani, mshikamano na uzalendo – tukionyesha kuwa taifa linaweza kusimama pamoja, kukimbia pamoja, na kushinda pamoja.

MBELE KUNA MWANGA MKUBWA

Tulia Trust imethibitisha kwamba uwekezaji katika jamii unaweza kuwa wa kipekee, wa kugusa maisha moja kwa moja. Tukio hili limeacha alama isiyofutika, na limeweka viwango vipya kwa matukio ya kitaifa nchini. Mbeya sasa inatazamwa kama role model ya namna matukio ya michezo yanavyoweza kuunganishwa na maendeleo ya kijamii na kiuchumi.

TULIA MARATHON SI TUKIO – ni harakati ya mabadiliko. Ni sauti ya Mbeya mpya, Tanzania mpya.

Tayari macho yanatazama mwaka 2026 kwa hamu – lakini kumbukumbu ya 2025 itabaki hai, kama mwanga unaoangaza njia ya mbele.